السلام عليكم ورحمة الله وبركاته
صباح الخير على الجميع
________________________
في سوالف عيونك لـ المحبة دليل
والمشاعر بـ حبك .. ما عليها كلام
الغلا له زمن فيني .. يحط و يشيل
والسهر من لياله صرت اعاف المنام
طال دربك وانا دربي ثقيل وطويل
بين وقت انتظار و بين شوق وهيام
ما بقى فيني من الصبر كود القليل
المسامع ظوامي .. والنواظر حيام
وماكسرني سوى حزني بوقت الرحيل
وما جبرني عليك الا جنون الغرام
لو ظمنت اني القى عقب حبك بديل
كان خلّيت ليلك و السهر والخصام
لاتخيّلت وصفك قلت : صبرٍ جميل
ولاطرت لي عيونك قلت :عمري حطام
فارع الطول ، ناعس عين ، خصرك نحيل
مايس القد ، سيّد البِيض ، بدر التمام
ما لوصفك شبيه / وما لحسنك مثيل
القصايد توقّف للجمال .. احترام
وكان قلبك من الفرقى كسير وعليل
لا تشح بـ وصالك ويعداك الملام
حط لي عن شموس الوقت عندك مقيل
وخلني في حياتك ذو قدر واهتمام
اقترب واخذني ياجعل عمرك طويل
الليالي بلا وصلك ، عليها السلام
من يداويك يا جرحٍ بـ قلبي يسيل ؟
ومن يسيّلك يا وبل المطر والغمام ؟
وكيف ابحييك يا حلم الغرام القتيل ؟
ومن يطفّيك ياجمر العتب والخصام ؟
ليت عقب العطا / ردّيت ربع الجميل
وليت عقب البطا / ما صار حبك كلام !
9/8/2017, 19:13
